Banyu Pinaruh Rahina Nunas Toya Kaweruhan

BANYU Pinaruh sajeroning umat hindu kategesin mawit saking kekalih kruna inggih punika saking kruna banyu mateges toya, miwah pinaruh mateges pangweruh (pengetahuan). Cutetnyané banyu pinaruh punika kaselehin pinaka toyan kaweruhan sané setata membah tan telas. Ring rahinané puniki, nepet Redité Paing wuku Sinta, akéh kramané sami ngawit sadurung endag surya sampun matangi tur sayaga melukat sareng kulawarga sané prasida kalaksanayang ring jero soang-soang miwah ring genah lianan jangkep antuk sarana sané kabuatang anggén melukat banyu pinaruh. Kramané melukat malarapan masiram ngrisikin raga miwah keramas saking sekala, yéning saking niskala banyu pinaruh mateges ngicalang mala, leteh sané neket ring angga sariran manusa pinih utamanyané sané neket sajeroning pikayunan sadurung mawali pacang kadagingin pangweruhan. Sajeroning melukat, krama sané magenah ring pegunungan minakadi ring Karangasem makanten ri kala mabanyu pinaruh sering melukat ring klebutan-klebutan toya (tirtha), telaga miwah tukad sané nampek. Yéning krama sané magenah ring wewengkon sané nampek sareng segara minakadi Dénpasar, Badung, Klungkung miwah sané tiosan nglaksanayang banyu pinaruh ring pasisi. Simbolisasi nglaksanayang banyu pinaruh ring tukad negesang pangweruhan sané sampun kaplajahin ri kala rahinan Saraswati prasida antar membah, yéning simbolisasi nglaksanayang banyu pinaruh ring segara negesang pangweruhan punika prasida ngawinang kaweruhan manusa sayan limbak tur nglebur sakancan tambeté (awidya), simbolisasi banyu pinaruh ring klebutan toya nyihnayang pangweruhan punika kaptiang mangda dados sakadi sumber pencerahan, majeng kahuripan krama miwah déwék ngraga kawigunayang sajeroning paindikan sané becik lan dharma. Krama sajeroning mabanyu pinaruh manut Jro Mangku Ketut Roja, wénten runtutanyané. “Reruntutannyané inggih punika kakawitin semengan umat melukat (asuci laksana) nganggén toya kumkuman inggih punika toya sané madaging sakatah sekar sané miyik, tirta griya. Sesampun punika kalanturang ngaturang nasi pradnyan (nasi yasa), jamu sadrasa miwah toya kumkuman pinaka pasucian. Raris nunas toya kumkuman kalanturang ngaturang bakti miwah nunas tirta. Pinih untat nunas labaan Saraswati inggih punika nasi pradnyan. Napi awinan nganggén nasi pradnyan santukan nasi punika pralambang kawikanan, malarapan ngajeng surudan nasi pradnyan manusa nunas kasidian. Yéning nginum loloh pralambang sadrasa pait ri sedek mlajah, ri sampun wikan pacang mangguh kasukertan lan bagia,” baosnyané. Para yowana kaptiang mangda prasida nyemertiang rahina Saraswati lan Banyu Pinaruh malarapan ngwacén sastra-sastra miwah nglaksanayang dharmatula manut ajah-ajahan agama, inggih punika kalaksanayang ring banjar-banjar, pura, sekolah miwah kampus gumanti yowanané yakti prasida uning ring semertin banyu pinaruh. (uma)